Lebenslauf
Timo am 8.April besch du gebore, mer hend eus riesig gfreut. Scho als Baby hesch du mit dim Strahle alli um de Finger gwecklet ond das het dech dors ganze Läbe begleitet. Du hesch gwösst was du wotsch, hesch eus mängisch usegforderet ond öpedie au völlig überforderet. Du hesch eus aber emer weder lo wösse ond lo gschpöre das mer för dech die richtige Entscheidige troffe hend, ond das het eus so guet to.
Du hesch es riesigs Herz för Tier ond d Natur . Die ungwöndlichschte Huustier hesch du gern gha. Wo du achti gsi besch, hesch du Lüüs ufgläse. Mer hend der welle d Hoor wäsche ond du hesch dech i dim Zimmer verschteckt, hesch ganz fescht brüelet ond hesch gseit: „Mami das esch so fies die händ doch au s Rächt zum Läbe.“Öpe emol hesch de Coco din Rieseschnägg vergässe wenn du ihn unter em Wasserhahne tuschet hesch, ond mer hend ihn ame ergendwo i de Chochi gfonde. Vor 2 Johr wo mer d Nanouc öbercho hend esch din gröschte Wonsch in Erföllig gange. Stolz besch du met ere id Wälpeschuel. Scho als Chline hesch du Froid a Ross gha ond besch 4 Johr go rite.
Met ere riesige Begeischterig besch du z Rütihof is Handball. D’ Handballlager send ame es Heileit gsi. Wenn er en Matsch verlore händ, hesch di forchtbar müesse ärgere. Wenn emol en Schiri falsch pfeffe het, het mer di fascht nömme chönne obenabehole. Hesch so Freud gha wenn d Mini hesch dörfe koutsche.
Dor dine ossergwöhnlichi Usschtrahlig ond dini offeni Art hesch du während dinere Chendzgi- ond Schuelziit onändlich veli Herze chönne gwönne. De Schrett id Oberstufe of Bade het der mega Angscht gmacht. Aber vo Afang a besch im Chreis vo de Grosse integriert worde ond hesch ganz Huufe wertvolli neui Frönde gfonde.
E Woche vor du chrank worde besch hesch bem Andi als Autolaggierer gschnopperet. Du hesch dech wahnsennig gfreut wo du im Spital Precht öbercho hesch, dass sie dech als Lehrling i ehrere Kru wend ha. Öberglöcklich hesch du de Lehrvertrag onterschrebe ond hesch welle met ene Wältmeischter werde.
D Jungwacht esch för dech de absoluti Hammer gsi. Die usgfallnigschte Idee hend dini Leiter för d Groppeschtonde ond d Lager usgheckt. Dini Leiter hesch du völlig vergötteret. No vor ere Woche send er zäme of de Rüssfahrt gsi. Du häsch sones megageils Abendtür erläbt. Hesch scho Plän gmacht was du emol alles met dinere Groppe wotsch onterneh, wänn du noch em Lager Leiter wersch.
Wo Afangs März dini Chranket usbroche esch, hesch du alles eifach chönne aneh. Nie hesch du met dim Scheksal ghaderet, ned einisch hesch eus gfroget werom han ich die Chranket. Alli Veränderige hesch du met ere onglaubliche Chraft ond ere so Positive Istellig here gno. Wie mängisch hesch eus tröschtet ond gseit:“Isi das chonnt scho guet.“ Du hesch die Ziit so intensiv gnosse, hesch echli tschillet , wenn hesch möge met dine Kollege abgmacht ond mer hend während dere ganze Ziit so vel glachet.
D Musig hesch du sehr gern gha, Schtondelang hesch i dim Zemmer ame din Sound gloset. E mega Freud hesch du gha wo of de 9ti Gebortstag es Schlagzüg öber cho hesch. De Rhythmus hesch du im Bluet gha, met ere grosse Begeischterig hesch Schlagzügonterrecht gno ond i de Perkussionsgroppe met gmacht. Zo dim 16te Gebortstag hesch vo eus en Mini iPod öbercho, met dinere Musig wo du selber drufglade hesch besch du am Samschtig Obig igschlofe.
Timo das wo mer höt do erläbet seit eus alles. De Schpruch vom Prenz of dim Chärtli esch so stemmig.
Timo du besch beliebt ond berüemt wie en Prenz